गोरखनाथको दर्शन गरेर पूर्व युवराज पारसको डाङडुङ रोकिएला ?

भिडियो हेर्न तलको बिज्ञापन लाइ हटाउनुहोस

काठमाडौं, ६ साउन । पूर्व युवराज पारस शाहका गतिविधि अलिक न्यून हुने गरेका छन् । पहिला जस्तो रेष्टुरेष्ट, क्यासिनो, रिसोर्टमा प्रवेश गरेर हुलदंगा गर्ने व्यवहारलाई सुधार्ने प्रयास उनले गरेका छन् ।

उनका गतिविधिलाई परिवारले नजिकबाट हेर्दै आएको पनि छ । परिवारले सुर्धान उनलाई अनेक प्रयास गरिरहेपनि सफल हुन भने सकेको छैन । यूनाइटेड पोष्ट साप्ताहिकले समाचार छापेको छ ।

पूर्व राजा ज्ञानेन्द्र शाह सपरिवार बस्दै आएको महाराजगञ्जको घर निर्मल निवास प्रवेशमा रोक लागेपछि बाहिर आफन्तकोमा बस्दै आएका पारस मंगलबार एकाएक पशुपतिनाथ मन्दिर परिसरमा झुल्किए । आफ्ना साथीहरूका साथ देखिएका पारसले गुरु गोरखनाथ बाबाको मन्दिरमा गई दर्शन गरेका थिए । पूर्व राजपरिवारले गुरु गोरखनाथ बाबालाई गुरु मान्दै आएको छ ।

मंगलबार गुरु पूर्णिमा परेकाले पारस गोरखनाथ बाबाको दर्शन गर्न मृगस्थलीको जंगलमा पुगेको उनका साथीहरूले बताएका छन् । पारसका समर्थकहरूले केही बेर उनको पक्षमा नारावाजी समेत गरेका थिए । उनीहरूले राजा आउ देश बचाउ पनि भने ।

सुनसान मृगस्थलीमा पारस आएको थाहा पाएपछि शुभेच्छुकहरूको खचाखच थियो । भद्र र शालिन अवस्थामा देखिएका पारसको अगाडि पछाडि उनका साथीहरू मात्रै थिए ।

मन्दिर परिसरमा पारसलाई दुई वृद्धाका साथै योगीहरूले स्वागत गरेका थिए । लामो कपाल पालेका पारसले मंगलबार प्याजी रंगको सर्ट र ट्राउजरका साथसामान्य खालको जुत्ता लगाएका थिए । आँखामा भने उनले चस्मा लगाएका थिए ।

गोरखनाथ बाबाको पूजा गरिसकेपछि मन्दिरका पुजारीले पारसलाई सयपत्री फूलको माला लगाइदिएका थिए । मन्दिर परिसरमा भेटिएका सबैलाई पारस आफैले हात जोडेर नमस्कार गर्दै सिंडीबाट झरे ।

बेलाबेलामा डाङडुङ गरेर चर्चामा आउन रुचाउने पारस मंगलबार भने उनलाई देख्ने सबैले यस्तो व्यक्ति किन बेलाबेलामा मात्तिएको होला भनेर प्रश्न गर्दै थिए ।

dainiknepal.com

भिडियो हेर्न तलको बिज्ञापन लाइ हटाउनुहोस